SITER GADHING
Dening : Djaimin K
Aja disetel
kenceng-kenceng iki siter
Siter gadhing
sumbering geter ati
Nadyan suwarane
cumengkling nyaring
Nanggapi osiking jagad
Nanging serat-serat
alus wajane,
Gampang putus
Satemah lampus
Balik yen disetel
kendho
Genah swarane blero
Yen jagoa jago kapuk
Tan wani kluruk!
Prayoga disetel
samadya
Iki siter gadhing
rerengganing dhadha
Murih wiramane laras
Ora kemrranyas
Kanthi swara sutra
Sapa ngerti kwawa
ngeluk gligen waja
Siter gadhing
gadhuhan-Ne
Yen swarane laras,
Muga: Nuju prana!
(Panyebar Semangat No. 47, 20 Nopember 1993, Pemenang Hadiah Sastra Rancage)
Sun iki turune Sang Gotama
nedya nggoleki jimat sejati
cupu manik asthagina
Sun tlasak sakubenging wana
sun kebur Tlaga Madirda
sun silemi dhasaring pratala
Megeng napas njejak siti bantala
del mumbul ing jumantara
tumekeng mega lapis sapta
Sun sawang keblat papat
kidul wetan lor lan kulon
nanging tan ana katon
Nuli ambles ing dhasar bumi
nedya takon mring Ibu Pertiwi
endi dununge jimat sejati
tan kasil kapeksa bali
Ana tembung tanpa sabda
ana swara tanpa rupa
yen cupu manik Asthagina
manggon aneng telenging nala
(Panyebar Semangat No. 47, 20 Nopember 1993, Pemenang Hadiah Sastra Rancage)
Endi Dununge
Dening : Senggana
Sun iki turune Sang Gotama
nedya nggoleki jimat sejati
cupu manik asthagina
Sun tlasak sakubenging wana
sun kebur Tlaga Madirda
sun silemi dhasaring pratala
Megeng napas njejak siti bantala
del mumbul ing jumantara
tumekeng mega lapis sapta
Sun sawang keblat papat
kidul wetan lor lan kulon
nanging tan ana katon
Nuli ambles ing dhasar bumi
nedya takon mring Ibu Pertiwi
endi dununge jimat sejati
tan kasil kapeksa bali
Ana tembung tanpa sabda
ana swara tanpa rupa
yen cupu manik Asthagina
manggon aneng telenging nala
0 komentar:
Posting Komentar