GURIT TANI

Paman Tani

Jroning era pembangunan iki

Labuh labetmu tanpa pepindhan

Tumrap bangsa miwah negari

Ing babagan budidaya pangan

Udan panas tanpa kokgagas

Kebo sapi tansah ngrewangi

Jroning makarya ngolah sawah

Kanggo nyengkuyung program pamerintah

Nggaru lan ngluku ing saben wayah

Tanpa metung wegah lan sayah

Kang kokpikir mung asiling pari

Nalika panen wus winanci

Paman tani lan bibi  tani

Patuladhanmu nyata pinuji

Jroning sengkut gumregut makarti

Kanggo karaharjaning sesame

Ing dhadhanu patut dak renggani

Saka guru pembangunan sejati

(Djaka Lodang .  No 11, 14 Agustus 2010)


Nandur Pari Jero
Dening : Dr. Sudi Yatmono


Nandur pari jero
Gemi satiti ngati-ati mring wiji
Sabar tlaten makarya olah kisma
Wani rekasa
Jaman ganti tumimbal jaman
Mangkono uga tradisi tumekaning teknologi
(teknologi kuwi rak ya sambungane tradhisi)
Mung bae beda-beda sing ngarani
Nandur pari jero
Katrajang ama kaprusa bancana donya
Apadene kang pusa
Durung pinaringan begja
Nanging tetep andhap asor ngagungake panarima
Jer iku nugraha samantara
Kang ngrengga rekadayaning manungsa
Bebarengan karo rajakaya nanggapi karsaning Kang Kuwasa
Bojo anak putu kulawarga sumilir ing pikirane
Nganti ora nggape awake dhewe
Sabuk galeng dhuwur galeng ngisor galeng
Kaya ora ana kang kapeleng
Kajaba kalumrahane bebrayane
Nandur pari jero
Kang diangen-angen mung udan
Jebul udane salah mangsa
Wolak-waliking labuh rendheng ndharendheng
Mareng ketiga dawa
Wis manekawarna budidaya
Arep apa
Nglunjak ora nyandhak mumbul ora jujul ngaya
Malah tuna
Nandur pari jero
Kang diangen-angen mung udan
Jebul udane salah mangsa
Bisane mung tetep setya ngenam pangarep-arep ngrajut
Katresnan nggeleng kapitayan
(Djaka Lodang . No. 44, 31 Maret 2007)