GURITAN SEKOLAH

SEKOLAH

Kanthi jangkah kang linambaran tekad,

Lan ati sumringah

Mlaku ngener sekolah

Aku mangkat sekolah

Langkah kang manteb

Kang ndhasari atiku manteb

Tandhane wajibe sregep

Atiku seneng banget

Arep ketemu kanca-kanca

Kang wus manjing dadi mitra

Neng ndalan tansah sopan

Supaya bisa lumaku nggayuh kamulyan

Adoh saka laku ngiwa

Kang bisa ngilangake tindak prayoga

Sekolah wakiling simbah

Kang wis ora bisa ndongeng

Pitutur kang bisa gawe ati ora semplah

Sokur bage aku ora keconggah

Gawe senenging bapa simbah
Slamet ora kakehan polah

  

  wengi sansaya atis

  nalika aku sesingidan ing sajroning swara gamelan

  kang digawa dening angin

  

  prasasat tan kendhat

  anggonku kulak warta adol prungu

  ananging isih mamring

  

  aku wis pingin cecaketan

  obormu kang makantar-kantar

  madhangi jangkah lan jagatku

  

  ana ngendi papanmu

  lelana tapa brata

  tanpa pawarta tanpa swara

  

  aku kadya ron garing

  kumleyang kabur kanginan

  ing jagat peteng lelimengan

  

  krasa luwih abot

  anggonku ngadhepi dina-dina ing ngarep

  mlakuku ora mantep

  

  kagubet ribet lan ruwet

  adoh saka cahyamu

  pedhut ing sakindering pandulu

  

  panjenengan

  guruku, sihku, oborku

  kancanana sukmaku sinau bab katresnan sajroning ati

                                         

   (PANJEBAR SEMANGAT Edisi 4 Tahun 2008, Surabaya, Budhi Setyawan)





Nalika rembulan moblong ucul saka gendhonganing  jagad
Ayo, gegancangan mapag abyoring lintang mayuta
Dimen biruning langit kang bakal kagelar ing wengi iki
Bisa kok gambari pangangen-angen geganthaning uripmu

Nalika rembulan moblong mancati tataraning langit
Ayo, gegancangan mapag tumuruning tetes atising embun wengi
Dimen gegambaran geganthaning uripmu
Bisa kok pulas karana abanging sedya

Nalika rembulan moblong panjer tengahing wengi
Ranggehen abyoring lintang mayuta
Lan jumputana tetes atising embun wengi
Kang kekinclong ing pucuk ijoning gegodhongan
Dimen geganthaning urip kang wus ginambaran
Ing jembaring pangangen-angen
Bisa pinatri ing ati sanubari

Lan nalika rembulan moblong wus pangklong tumpak gigiring arga
Sumetana oboring laku lan cawisna tekening urip
Dimen gegambaran geganthaning urip kang wus kapatri
Bisa kababar bareng mletheking baskara esuk.